فطائر محشية باللحم

المقادير/

3 كيلات فرينة + ملح

ربع كيلة زيت للتبساس

كيلة حليب : يمكن الاسغناء عنه لكنه يفضل لضمان النتيجة

حبة بيض وعلى حسب كيلتك زودي لبيض

خميرة الخبز نصف فنجان + ملعقتين اكل سكر


تعجن بماء دافي

اعجنيها وخليها طرية بزاف تلتسق بليد

خليها ترتاح نصف ساعة - درجة حرارة الغرفة -
 

 بعد ما ترتاح

خرجي لهوا لي فيها وادلكيها

وابدئي في تحضير الحشوة
.
الحشوة/

لحم مرحي + بصلة + ثوم + فلفل اسود + ملح طايبين نص طياب

+ طماطم ما طيبيهاش معاهم قطعيها مربعات صغيرة + دبشة

+ فلفل حار مقطع مربعات صغيرة+ زيت زيتون أو سمن أو بدون

-----------------------------طريقة التحضير-------------------------------------

جيبي يلالة الصينية تاعك لي راح ادخليها لفرن

وادهنيها مليح بالزيت ملييييييييييييييح

وقرصي لعجينة لقرص كيما تع الرقاق


وستفيهم في الصينية وحدة بحذا اختها

خلي بينهم خيس اصبع الشهادة مسافة

وزيدي ملفوق ادهنيهم مليح مليييييييييييح بالزيت






لما تكملي تستاف تكون المعجنات انتفخت شوي

وباصبعي الشهادة و الوسطى مدهونين بالزيت عملي فتحة

ووسعيها شوي شوي وضعي داخلها الحشوة

وحدة وحدة تكمليهم لكل

ودخليهم لفرن راح ياخذوا شكل مربع

ويسهل الفصل بينهم الزيت

وتصبح كل وحدة وكأنها كاسة محشية لحمة

الشخشوخة البوسعادية

أولا لعجينة تتعمل بالماء و الملح و فرينة + سميد نص بنص

و اللي تحب تعمل سميد وحدوا شادة شوي روحها على عجينة الرقاق

تخليها ترتاح ومبعد تقرصيها

تاخذي 3 قرص وتحليهم شوي وتحطيهم فوق بعضهم وتكملي تحليها

وعلى طاجين الطين تاع البغرير - الغرايف - تطيبيها

و تفتتيها كيما الثريدة لكن باليد

وتحضري لاصوص

- طماطم - بصلحة ثوم و البهارات + لحم أو دجاج وتقليهم مليح وتخليهم يطبخوا

قبل ما تغلقي على النار تكوني محضرة كمية كبيرة تع بصل مقطع لنصف شرائح

كبيرة تحطيه على البرمة و تظيفي ورق الرند + الفاح + الحار + قليل من الثوم

وكي اطفي النار + الكسبر

تجيبي الفتات و تخلطيه مع الصوص اللي تكوني خليتي منها شوي للوجه

تزينيها بالكسبر و البيض

تؤكل مصحوبة بالرب - يشبه المعجون - مصنوع بالتمر + الدهان العربي

وهذا شكلها النهائي تقريبا

البركوكش - البركوكس

البركوكش وهو وصفة عائلية اصيلة لجدتي الغالية ربي يرحمها


طريقة التحضير

نضع في كسرونة كمشة من الغرس ونسقيها بالماء الدافئ ونتركها تترنخ مليح
لما تترنخ ندعك مليح الغرس في الماء كيما نقو لغدس نفس الطريقة
حتى يصبح لون الماء بني غامق اذا احتجت تكرار العملية يمكنك فعل ذلك

لما تكملي ضعي الماء المصفى من التمر في القدر لي راح طيبي فيه وتظيفي الماء بقدر الحاجة



من جهة أخرى تكوني رنختي كمشة : فول يابس وفرماس و عدس وطماطم يابسة صفيهم وضعيهم في القدر




هرسي الفلفل الأحمر اليابس مع الثوم و الملح والفاح وضعي الكل على باقي المقادير

يفضل توضعي لحم القديد لكن لأن زوجي ما يحبو وضعت قطع صغيرة من الدجاج

ايضا ما ننسى طماطم وبصل مرحيين وطماطم علب وزيت و كمشة حلبة

لما يغلى ضعي على الكسكاس حوالي رطل بركوكش مدهون بالزيت يفور أنا نفور مرة وحدة لأنه اساسا مفور

بمجرد ما يفور حطيه في القدر لأن المقادير تكون نضجت بحوالي 50 بالمائة خليه يكمل معاهم طياب

قبل ما تطفي بعشر دقائق ضعي الرند قرن فلفل حار زوج ملاعق ك حبة البركة

وهذا شكله النهائي









يمكنك وضع على الوجه الدهان أو زيت زيتون وللنفساء يوضع الضرور - وهو مجموعة اعشاب جد طيبة ومفيدة لها

شطيطحة بوزلوف

السلام عليكم

كباقي العائلات الجزائرية ،اعد البوزلوف بعدة طرق منها لمفور ومنها في الكوشة ومنها الشطيطحة وغيرها وهاته الأخيرة هي آخر ما اعددته
لما زرت بيت اهلي وطلبت مني أمي نعملهم الشطيطحة واظنها خاصة بي ان كانت هناك من تفعله بطريقتي فهذا توارد جميل وارجوا أن افيد اخواتي ممن لا يعرفن هاته الطريقة.

هنا عملت زوج ريسان تقدر الأخت تطبها على راس واحد أو أقل حسب الحاجة وربة البيت عينها ميزانها

الشرح بالصور

نقيت البوزلوف وحطيتو في برمة كبيرة يغلي في الماء و الملح وكل مرة نحي الزنخة لي تظهر على الوجة

وحطيت معاه 3 ريان زرودية و زوج ريسان ثوم كامل وحوالي اربعة قرون فلفل حار وورق رند

وخليتو يطيب بنسبة 80 بالمئة حوالي ساعة

هنا صفيت الماء ونزلتو






هنا نحيتلو لعظام








هنا قطعتو مربعات ونقيت راس الثوم من القشور وحطيتهم عليه






في كوكوت كبيرة قليت فالزيت البصل و الطماطم و الملح والفاح - مجموعة من البهارات مشكلة وضعتوا من قبل في موضوع منفرد -
وحمص وطماطم معلبة وشوي دبشة ومعدنوس





لما تقلى مليح حطيت عليهم البوزلوف المقطع مع الثوم وقلبتوا مليح ومبعد مرقتوا بالماء الساخن





قبل مانطفي بحوالي عشر دقائق ظفت الرند - يفضل تركه دائما للأخير لأنه يمرر الأكل في حال طول الطبخ -
و الفلفل الحار

وزينتو بخليط الدبشة و المعدنوس


وهذا شكله النهائي

تليتلي بالكاي - طائر السمان -

التليتلي بالكاي


تحضير المرق

*حبة كبيرة بصلة
* 2 حبات طماطم كبار
* حمص مشمخ
* طماطم مصبرة
* مرق دجاج أو عظام اذا كنتي محتفظة بيهم
* وريقات رند
* ملح
* لفاح
* زيت
* ثوم





طريقة التحظير : تقلي المقادير مليح ومبعد تمرقي
تحضري الطائر تنقيه وتحشيه بلحم مرحي - خطوة اختيارية -
لما تغلي المرقة ترميهم فيها
قبل النضج ندوزنها للمرة الثانية
ثوم - فلفل حار - فاح

أما تليتلي نحمصو في المقلة ومبعد ندهنو بالزيت و نشمخوا بالماء ونخليه يفور
نكرر العملية مرتين، في الأخير نزلوا في قصعة ونحط عليه قطع زبدة نسمغوا مليح
ونوضع قليلا من المرق ومبعد نزين الطبسي تاعي بباقي المرق و الحمص والكاي

شىربة فريك وطاجين الجلبانة مع السلطة

السفنج

المقادير


رطل فرينة
حبة بيض
ملعقة كبيرة خميرة
ملعقة ك سكر
ملح
ماء دافي
زيت القليان

طريقة التحضير


في قصعة نوضع الفرينة والسكر و الخميرة ونعجنهم بالماء مذوب فيه الملح
مليح حتى تصبح العجينة تتلاصق نتركها ترتاح خمسة الى عشر دقائق
ثم نزلها نكسر فيها حبة بيض لما تتداخل مع العجين نتركو مدة نصف ساعة
نكون محضرة زيت القليان نبدأ نشكلها ونقلي ونقلب حتى تحمر على الوجهين
  

لما نكمل نشف كل مجموعة مليييييييييييييييييييييييح من الزيت ،ونرشهم بالسكر أو عسل أو نقدمهم هكداك ناشفين مع قهوة المساء 

خبز الدار الجزائري

المقادير

2 كيلات سميد رطب + كلية فرينة = رطل أو يزيد قليلا
3 ملاعق لحظة
2 حبة بيض ،انزعي صفار احداهما لدهن وجهها
م ك سكر
ملح
سانو أو بسباس أو حبة حلاوة أو جلجلان أو بدون عادي
ملعقة ك خميرة

نعجن العجين بالماء الدافي ونخليه يتخمر مرتين وفي المرة الأخيرة
نوضع السمن قطع صغيرة وندخلو مليح في لعجين وتحلها في صينية مدهونة بالسمن وزيت
لما تخمر ندهنها بصفار بيضة بيه قطرات من القهوة ونزينها بالجلجلان و السانوج

الشريك أو البريوش من مطبخي

طريقة تحضير الشريك



رطل فرينة
3 ملاعق ك لحظة
3 ملاعق زيت
1 ملعقة كبيرة خميرة
4 ملاعق كبار سكر
2 حبة بيض صفار احداهما لدهن الوجه

نعجنو مليح ونخليه يخمر مرتين
قبل ما نقرص نفتت الزبدة- باااااااااردة - قطع صغيرة
ندخهم في العجين ونقرصو ونزينو اما بالمقص أو لام جيلات
أو ياخذ أشكال الورد وغيرهم لكن الحرية
وفي الوجه ندهنو بصفار بيضة وقطرات قهوة ثم نرش عيه الجلجلان وسكر
  

فليكات البطاطا بالدجاج

نبدا بالبطاطا نحضرها

* أختار كمية بطاطا بعدد أفراد العائلة ونقصها عرضيا و نفرغها من داخل .
ثم نقليها في زيت سخون بزاف حتى تحمر فقط من برا وتعمل قشرة

مقادير الصوص

* 4 حبات طماطم متوسطة
* راس ثوم كبير
*ملح
* فلفل اسود
* سكر
* قلييلا من الحبق
* زيت

طريقة تحضير الصوص

اضع حبات الطماطم في كسرونه بها ماء مغلي ليسهل علي تقشيرها
وبعد ما نقشرها اضع باقي المقادير الا الحبق على النار لما تنضج اضع عليها الحبق

تحضير الحشوة

صدر دجاج واحد يعمل 7 فليكات
ثوم
فرماج
معدنوس
دبشة
ملح وفلفل اسود
حبة بيض
قليلا من الشابلور



طريقة التحضير

نرحيهم الكل في الروبو ونحشي بيهم الفليكات ونعمرهم مليح بطريقة
وفي صينية الفرن نحط الصوص وفوقها الفليكات ونتركهم ينضجوا
ويقدموا سخونين

مكرونة بالبيشاميل

عمايل ايدايا وحياة عينيا

طعام - كسكسي - بالدجاج و صوص الخضر الحمراء

الرقاق لأنجح شخشوخة سوفية

 

 وهاهو عملت بيه أحلى شخشوخة لأحلى عروس

بيتزا الطاجين من مطبخي